Bashkimi Evropian ka paraqitur tre opsione për të financuar Ukrainën në vitet 2026–2027, mes të cilave një grant prej 90 miliardë eurosh ose një kredi e mbështetur nga borxhi i BE-së.
Kjo lëvizje vjen ndërsa plani i preferuar për të përdorur asetet e ngrira ruse prej rreth 200 miliardë eurosh po has rezistencë, kryesisht nga Belgjika.
Në letrën drejtuar udhëheqësve të BE-së, Ursula von der Leyen thekson se grantet do të kishin një ndikim të moderuar në PBB-në e vendeve anëtare, ndërsa kredia do të kërkonte garanci të forta dhe të pakushtëzuara.
Plani i përdorimit të aseteve ruse parashikon që Euroclear të marrë një kontratë borxhi që do të mbulohej nga BE në rast të kërkesave të ardhshme ruse.
Ukraina do t’i shlyente kreditë vetëm nëse Rusia refuzon të paguajë dëmet që i ka shkaktuar.
Belgjika po e bllokon për momentin këtë zgjidhje për shkak të rrezikut financiar që mund të bie mbi të, duke kërkuar garanci shtesë.
Negociatat e javës së kaluar midis von der Leyen dhe kryeministrit belg nuk prodhuan përparim.
Ndërkohë, Ukraina do të ketë nevojë urgjente për mbështetje që në fillim të vitit të ardhshëm, veçanërisht për shpenzimet ushtarake që për 2026-n kapin 51.6 miliardë euro.
Vlerësimet e BE-së tregojnë se nevojat totale financiare të Kievit mund të arrijnë 70 miliardë euro në vitin 2026 dhe 64 miliardë euro në 2027.
Për të adresuar shqetësimet belge, Komisioni ka propozuar shfrytëzimin e 25 miliardë eurove të tjera nga asetet ruse të mbajtura në vende të tjera anëtare.
Ai gjithashtu ofron mbulimin e rreziqeve nga traktatet dypalëshe të investimeve dhe ato që mund të lindin pas zhbllokimit të aseteve.
Sipas Komisionerit Valdis Dombrovskis, dokumenti i opsioneve do të saktësohet vetëm pasi të merren reagimet e para nga shtetet anëtare.
