Borxhi publik i Shqipëria në raport me Prodhimin e Brendshëm Bruto ka shënuar rënie të ndjeshme gjatë dekadës së fundit, duke reflektuar përmirësim të qëndrueshmërisë fiskale dhe menaxhim më efikas të portofolit të borxhit.
Sipas të dhënave të Ministria e Financave, raporti borxh/PBB ka zbritur nga 70.03% në vitin 2014 në 54.21% në vitin 2024 dhe 53.04% në vitin 2025 (të dhëna paraprake deri më 31 dhjetor 2025).
Kjo tregon se ekonomia është rritur me ritme më të shpejta sesa borxhi, duke përmirësuar balancat fiskale.
Njëkohësisht, është ulur edhe kostoja e financimit.
Yield-i mesatar i borxhit të brendshëm ka rënë nga 4.56% në vitin 2024 në 4.23% në vitin 2025, ndërsa kostoja mesatare e borxhit të jashtëm nga 3.70% në 3.53%.
Financimi me norma më të ulëta interesi ndikon drejtpërdrejt në reduktimin e shpenzimeve për shërbimin e borxhit.
Struktura e portofolit paraqitet më e balancuar: borxhi i brendshëm përbën 59.4% të totalit, ndërsa ai i jashtëm 40.6%.
Pesha e borxhit në valutë të huaj ka rënë në rreth 40%, duke reduktuar ekspozimin ndaj rrezikut valutor.
Gjithashtu, maturimi mesatar i borxhit të brendshëm është zgjatur ndjeshëm, duke arritur në 2.8 vite (1002 ditë) në vitin 2025, krahasuar me 1.7 vite (630 ditë) në vitin 2014 dhe 2.6 vite (923 ditë) në vitin 2024.
Zgjatja e maturimit përmirëson profilin e rifinancimit dhe rrit qëndrueshmërinë afatmesme të financave publike. /ATA
