Depozitimi automatik i parasë në bankomate në Shqipëria shënoi një rritje të fortë gjatë vitit 2025.
Sipas të dhënave të Banka e Shqipërisë, klientët e sistemit bankar realizuan rreth 2.2 milionë depozitime cash në ATM, me një rritje prej 109% krahasuar me një vit më parë.
Në vlerë, depozitimet arritën në 104.8 miliardë lekë, rreth 110% më shumë se në vitin 2024.
Rritja e përdorimit të këtij shërbimi është shoqëruar me zgjerimin e infrastrukturës. Në fund të vitit 2025, numri i ATM-ve që ofrojnë funksion depozitimi arriti në 430 njësi, 9% më shumë se një vit më parë.
Mbi 39% e ATM-ve në vend tashmë mundësojnë depozitimin e parasë cash.
Automatizimi i depozitimeve ka ndikuar në uljen e fluksit në degët bankare, duke shkurtuar radhët dhe duke orientuar klientët drejt kanaleve alternative për veprimet me cash.
Në fund të vitit 2025, sektori bankar kishte 1,091 ATM aktive, në rritje me 8% në bazë vjetore.
Pas një rënieje në periudhën 2015–2019, për shkak të reduktimit të degëve dhe konsolidimit të bankave, numri i ATM-ve filloi të rritet nga viti 2020, i nxitur edhe nga pandemia dhe nevoja për të lehtësuar operacionet në sportele.
Një faktor shtesë që ka ndikuar në zgjerimin e rrjetit është turizmi.
Rritja e numrit të vizitorëve të huaj ka shtuar kërkesën për ATM, sidomos në zonat turistike, ku shpesh pajisjet operohen në partneritet mes bankave dhe kompanive që tregtojnë ATM.
Megjithatë, paralelisht me zgjerimin e infrastrukturës cash, vihet re rënie e përdorimit të kartave për tërheqje dhe depozitime.
Për herë të parë në vitin 2025, numri i pagesave me kartë në terminale POS tejkaloi numrin e tërheqjeve dhe depozitimeve në ATM.
Vetëm 46% e veprimeve me karta bankare ishin transaksione cash, nga 52% në vitin 2024.
Edhe në vlerë monetare, pesha e operacioneve cash zbriti në 81% të volumit total, duke reflektuar zhvendosjen graduale drejt pagesave elektronike. /Monitor
