Këshilli i Lartë i Prokurorisë ka zgjedhur sot Klodian Brahon si drejtuesin e ri të Prokurorisë së Posaçme kundër Korrupsionit dhe Krimit të Organizuar (SPAK).
Procesi u zhvillua pasi anëtarët e KLP-së dëgjuan katër kandidatët në garë: Adnan Xholi, Doloreza Musabelliu, Elvin Gokaj dhe Klodian Braho.
Në votimin final, Braho siguroi 7 vota, duke marrë shumicën e nevojshme për drejtimin e institucionit.
Ndër kandidatët e tjerë, Adnan Xholi mori 3 vota, ndërsa Elvin Gokaj 1 votë. Kandidatja Doloreza Musabelliu nuk mori asnjë votë.
Votimi nuk u zhvillua me procedurë të fshehtë; anëtarët e Këshillit votuan hapur për kandidatët.
Me zgjedhjen e tij, Klodian Braho pritet të drejtojë një prej institucioneve më të rëndësishme të luftës kundër korrupsionit dhe krimit të organizuar në vend, në një moment kur pritet intensifikim i hetimeve dhe i dosjeve në proces.
