Ankimohet tenderi për linjën hekurudhore Porto Romano–Sukth

Tenderi për hartimin e projektit të detajuar teknik të linjës hekurudhore Porto Romano–Sukth është ankimuar në Komisioni i Prokurimit Publik, me pretendime që lidhen me dokumentacionin dhe specifikimet e procedurës.

Në këtë fazë, ankimimet zakonisht fokusohen te kriteret dhe kushtet e vendosura nga autoriteti kontraktor, për të cilat operatorët ekonomikë paraqesin rezerva.

Procedura u hap në gusht të vitit të kaluar dhe mbetet ende e papërfunduar.

Autoritet kontraktor është Autoriteti Portual Durrës, ndërsa në hartimin e specifikimeve teknike është përfshirë edhe Hekurudha Shqiptare.

Projekti konsiderohet strategjik në kuadër të planeve për zhvendosjen e portit aktual drejt Porto Romano, megjithëse procesi i ndërtimit të portit të ri nuk ka shënuar zhvillime të reja publike.

Në tetor u njoftua se fituesi i garës ndërkombëtare do të shpallej më 31 janar 2026, por deri tani nuk ka një njoftim zyrtar.

Linja e re hekurudhore

 

Sipas dokumenteve të tenderit, linja nga lidhja me rrjetin ekzistues deri në hyrje të portit të Porto Romanos do të ketë gjatësi 7,879 metra.

 

Në hyrje të degëzimit, trenat do të kalojnë në dy ndërrues hekurudhorë që do të instalohen në linjën kryesore Durrës–Sukth, duke formuar trekëndëshin hekurudhor.

 

Pas rreth 1.1 kilometrash drejt Porto Romanos, parashikohet një ndërrues tjetër simetrik, për shkak të funksionit të tij operacional.

Më tej, treni do të përshkojë rreth 4.7 kilometra deri në hyrje të stacionit të pranimit dhe nisjes, ndërsa pas daljes nga stacioni do të mbeten edhe rreth 1.1 kilometra deri në hyrje të portit të ri.

Projekti synon të sigurojë një lidhje të drejtpërdrejtë hekurudhore për transportin e mallrave drejt portit, duke rritur efikasitetin logjistik dhe kapacitetet e përpunimit të ngarkesave. /Monitor