Shqipëria ka shënuar një tjetër hap në procesin e integrimit europian, pasi Konferenca e tetë e Anëtarësimit në Bruksel konfirmoi përmbushjen e kritereve të ndërmjetme për grupin e kapitujve themelore, që përfshin drejtësinë, të drejtat themelore, administratën publike dhe kriteret ekonomike.
Ky zhvillim i hap rrugën vendit për të nisur procesin e mbylljes së kapitujve negociues, një fazë që konsiderohet vendimtare në rrugën drejt anëtarësimit në Bashkimin Europian.
Megjithatë, pavarësisht deklaratave optimiste të qeverisë shqiptare, progresi i Tiranës mbetet më i ngadaltë krahasuar me vende të tjera të rajonit, veçanërisht Malin e Zi.
Ky i fundit përmbushi kriteret e ndërmjetme për kapitujt themelorë që në vitin 2024 dhe ka avancuar më shpejt në mbylljen e kapitujve negociues, duke u konsideruar aktualisht kandidati më i avancuar për anëtarësim në BE.
Ndërsa Shqipëria vetëm tani hyn në fazën e vendosjes së standardeve për mbyllje, Mali i Zi ka arritur të mbyllë provizorisht një numër të konsiderueshëm kapitujsh dhe shihet si vendi i Ballkanit Perëndimor më pranë anëtarësimit europian.
Kjo diferencë ka nxitur debate mbi ritmin e reformave në Shqipëri dhe efektivitetin e zbatimit të tyre, përtej retorikës politike dhe premtimeve për integrim të shpejtë.
Bashkimi Europian ka theksuar se procesi mbetet i bazuar në meritë dhe se progresi real do të matet jo nga deklaratat politike, por nga rezultatet konkrete dhe të qëndrueshme në terren.
Ky zhvillim vjen pak ditë përpara Samitit BE–Ballkani Perëndimor të 5 qershorit, ku zgjerimi dhe e ardhmja europiane e rajonit pritet të jenë ndër temat kryesore të diskutimit.
