Në vitin 2024, Banka e Shqipërisë arriti një fitim neto prej 5.2 miliardë lekësh, duke u rikthyer në rezultat pozitiv pas dy viteve me humbje të mëdha.
Përmirësimi erdhi kryesisht nga stabilizimi i kursit të këmbimit, pasi humbjet nga ky zë ranë me 63% krahasuar me vitin 2023.
Rënia e ngadalësuar e Euros ndaj Lekut dhe rritja e vlerës së arit monetar sollën efekte pozitive në bilanc, me të ardhura nga rivlerësimi e arit në vlerën e 5.7 miliardë lekëve.
Po ashtu, të ardhurat gjithëpërfshirëse arritën në 7.7 miliardë lekë, të ndikuara nga rritja e çmimit të letrave me vlerë për shkak të uljes së normave të interesit.
Edhe pse kapitali neto mbetet negativ në -9 miliardë lekë, ai u përmirësua ndjeshëm nga -16.7 miliardë lekë një vit më parë, falë rezultatit pozitiv dhe shtimit të rezervave.
Banka vlerëson se mbetet e mirëkapitalizuar, ndërsa fitimet dhe humbjet nga rivlerësimi janë të përkohshme dhe varen nga kushtet ekonomike ndërkombëtare. /Revista Monitor
