Siguruesit parashikojnë se zbatimi i sistemit bonus-malus do të ketë një efekt negativ prej rreth 4.5–5 milionë euro në primet e shkruara bruto të sigurimit të detyrueshëm motorik.
Sipas tyre, vetëm rreth 4% e drejtuesve të mjeteve kanë shkaktuar dëme dhe do të paguajnë prime më të larta në vitin 2026, me një rritje mesatare rreth 18%.
Ndërkohë, rreth 96% e drejtuesve pa dëme do të përfitojnë një ulje të primit prej afërsisht 3%, duke ulur të ardhurat totale të kompanive.
Të dhënat e Autoriteti i Mbikëqyrjes Financiare tregojnë se gjatë 12 muajve të fundit janë lidhur rreth 747 mijë kontrata sigurimi, nga të cilat vetëm rreth 30 mijë do të preken nga rritja e primit.
Sistemi bonus-malus, i parashikuar në ligj që prej vitit 2021, ka nisur zbatimin praktik nga 1 janari i këtij viti.
Ai synon të penalizojë drejtuesit problematikë dhe të shpërblejë ata korrektë, duke e lidhur çmimin e sigurimit me historikun e dëmeve./Monitor
