Tirana është shndërruar në një nga qytetet me përballueshmërinë më të ulët të banesave në Europë, ku një familjeje mesatare i duhen rreth 15 vite pune për të blerë një apartament.
Sipas vlerësimeve për vitin 2026, raporti i çmimit të banesës me të ardhurat vjetore në kryeqytet arrin në 15.1 vite, duke reflektuar një pabarazi të thellë mes çmimeve dhe fuqisë blerëse.
Të dhënat e Numbeo tregojnë se Shqipëria ka një nga raportet më të larta në Europë, duke u renditur krah Serbisë, me mbi 14–15 vite të ardhura të nevojshme për blerjen e një banese.
Në kontrast, vendet e Europës Perëndimore si Gjermania dhe Danimarka regjistrojnë raporte nën 9 vite.
Edhe pse çmimet absolute të banesave në Perëndim janë më të larta, fuqia më e madhe blerëse e qytetarëve e bën strehimin relativisht më të përballueshëm.
Në Gjermani, familjet shpenzojnë mesatarisht 20–30% të të ardhurave për strehim, ndërsa në Shqipëri kjo peshë i kalon 40%.
Në kuadër të negociatave për anëtarësim në BE, Shqipëria ka mundësi të adoptojë politika europiane të strehimit, duke synuar kthimin e strehimit në një të drejtë reale dhe të përballueshme për qytetarët. /Euronews
