Friedrich Merz paralajmëroi se mes Shtetet e Bashkuara të Amerikës dhe Evropës është krijuar një çarje serioze, duke u bërë thirrje të dyja palëve të punojnë për riparimin e besimit dhe ringjalljen e partneritetit transatlantik.
Në hapje të Konferenca e Sigurisë në Mynih, ai theksoi se rendi ndërkombëtar i bazuar në rregulla “nuk ekziston më”, ndërsa bota po hyn në një epokë më të pasigurt të dominuar nga rivaliteti i fuqive të mëdha.
Sipas tij, lufta e Rusisë në Ukrainë është dëshmia më e qartë e këtij transformimi, ndërsa Kina po riformëson sistemin global duke shfrytëzuar varësitë ekonomike.
Merz vuri në pikëpyetje edhe pretendimin për lidership global të SHBA-së, duke theksuar dallimet mes Evropës dhe politikave të administratës së Donald Trump, sidomos për tarifat, proteksionizmin dhe marrëveshjet klimatike.
Megjithatë, ai nënvizoi se aleanca mbetet jetike, pasi të qenit pjesë e NATO është avantazh strategjik për të dyja anët e Atlantikut.
Kancelari shtoi se Evropa duhet të përshtatet me një realitet ku aleancat tradicionale nuk janë më të garantuara, duke përmendur edhe tensionet e shkaktuara nga tentativa e Trump për Groenlandën.
Në këtë kontekst, Gjermania synon të zgjerojë partneritetet me vende si Kanadaja, Japonia, Turqia, India dhe Brazili për të reduktuar varësitë strategjike.
Ai bëri të ditur gjithashtu se ka nisur bisedime konfidenciale me Emmanuel Macron për një parandalim bërthamor evropian, duke theksuar se çdo “ombrellë” e tillë do të mbetet e integruar brenda strukturave të NATO-s.
Në konferencë marrin pjesë mbi 60 liderë botërorë, përfshirë presidentin ukrainas Volodymyr Zelensky, kryeministren daneze Mette Frederiksen dhe kryeministrin polak Donald Tusk, me fokus diskutimet mbi luftën në Ukrainë dhe tensionet me Iranin. /ATA
